Poliisi y’e Rukungiri ekutte omusomesa ku by’okusobya ku mwana atanetuuka myaka 13 namutikka n’olubuto.
Martial Ahimbisibwe ng’asomesa Social Studies (SST) ku Nyakibale Upper boarding primary school mu ggoombolola y’e Rukungiri yakwatiddwa.
Omwana gwe basobyako abadde asoma primary seven (P7).
Adduumira Poliisi y’e Rukungiri (DPC), Moses Nanoka agambye nti bakutte omusomesa Ahimbisibwe okuva mu maka ge ku kyalo Kagashe ggoombolola y’e Rukungiri oluvanyuma lwa bazadde okudduukira ku Poliisi okuyambibwa, olunnaku olw’eggulo ku Ssande.
DPC Nanoka agambye nti omukwate ali ku Central Police Station (CPS) e Rukungiri era essaawa yonna wakutwalibwa mu kkooti ku misango gy’okusobya ku mwana, amangu ddala nga bakomekereza okunoonyereza.
