Poliisi ebikudde ebyama ebyaviriddeko dereeva w’omubaka w’e Kyadondo East Robert Kyagulanyi ssentamu, amanyikiddwa nga Bobi Wine, Yasin Kawuma okuttibwa olunnaku olw’eggulo ku Mmande.
Kawuma yakubiddwa amasasi agamutiddewo mu kibuga Arua, okumpi ne Hotel Pacific ng’ali mu mmotoka, ekika kya Tundra namba UAT 416K.
Wabula omwogezi wa Poliisi mu ggwanga Emilian Kayima agambye nti, abawagizi ba Kasiano Wadri omu kwabo, abesimbyewo ku bubaka bwa Palamenti mu Arua Municipality, bebaviriddeko Kawuma, okuttibwa era abasuuka 7 bakwattiddwa okuyambako Poliisi mu kunoonyereza.
Kayima agamba nti abawagizi ba Kasiano Wadri, basiwuuse empisa ne bakasukira amayinja emmotoka z’omukulembeze w’eggwanga lino Yoweri Kaguta Museveni eyabadde ava ku kisaawe kye Boma okunoonyeza munnakibiina kya NRM, Nusura Tiperu akalulu era emmotoka eyabadde ekulembeddemu oluseregende yakubiddwa endabirwamu neyiika.
Kayima era akatiriza nti ekitongole ekikuuma ddembe ekya Poliisi, kyawaliriza okweyambisa amasasi mu banga okutebenkeza embeera kyoka engeri Kawuma gye yakubiddwa amasasi nattibwa, batandiise okunoonyereza.
Ku ky’okukwata ababaka ba Palamenti abamu, Kayima agambye nti essaawa yonna okuva kati agenda kuyita bannamawulire, okulambulula ekyabaddewo.
