Gavumenti yewunyiza engeri omubaka we Kyadondo East, Robert Kyagulanyi Ssentamu amanyikiddwa nga Bobi Wine gye yavuddeyo mu ddwaaliro okwogerako eri abamawulire mu ggwanga erya America mu kibuga Washington, DC.
Bobi Wine yasinzidde mu lukungana nategeeza nti ebyamutuukako tebirina ngeri yonna gye byamunafuya mu nteekateeka ye ey’okuweereza Bannayuganda ng’ayita mu bukulembeze.
Mungeri y’emu yategezeza nti bamutulugunya nnyo kyoka essaawa yonna agenda kudda mu ggwanga lye (Uganda) okusobola okuddamu okulwanirira emirembe n’enkyukakyuka.
Wabula Ofwono Opondo omwogezi wa Gavumenti bwawulidde ebyogeddwa Bobi Wine ne looya we Robert Amsterdam naye ayanguye okubaddamu n’ategeeza nti bano bali ku kakodyo kubuzaabuza misango egivunaanibwa Bobi Wine.
Opondo agamba nti Bobi Wine wa ddembe okudda e Kampala neyeemulugunya kwebyo byagamba nti tebyatambula bulungi.
“Engeri gy’agamba nti yakubibwa mu busajja bwe, nnaku 3 nga bamukuba mu busajja, singa takyatambula, ndowooza obusajja bwe bwamannyi nnyo, bwoba wakubibwa bubbi n’okufuna obuvune n’osobola okutambula essaawa ezisuuka 20” Opondo bwanyonyodde.
