Omubaka we Kyadondo East Robert Kyagulanyi ssentamu amanyikiddwa nga Bobi Wine asabiddwa Poliisi, okuyimiriza bunnambiro ekivvulu ky’oluyimba “Kyarenga”, ekibadde kitegekeddwa mu kisaawe e Namboole, sabiti eno ku Lwomukaaga nga 20, October, 2018.
Okusinzira ku kiwandiiko ekyafulumiziddwa nga 16, October, 2018, amyuka addumira Poliisi mu ggwanga era akulira ebikwekweeto mu kitongole ekya Poliisi Asuman Mugyenyi yalabudde Emma Serugo akulira Emma Promotionz and Marketing Agency, abakuliddemu okutekateeka ekivvulu, okuyimiriza entekateeka zonna, okutuusa nga bafunye olukusa okuva eri abakulira ekisaawe kye Namboole.
Serugo agamba nti wadde, bawandikiddwa ekitongole ekya Poliisi, tebanasalawo kyankomeredde ku ky’okuyimiriza konsati yabwe.
Mungeri y’emu agambye nti, ebigenda mu maaso mu ggwanga, biraga nti Poliisi yekulembeddemu okulemesa entekateeka zonna nga bekwasa obusongasonga obutaliimu.
Kigambibwa mu kisaawe e Namboole, ku lunnaku Olwomukaaga waliwo e Mbaga nga y’emu ku nsonga lwaki ekivvulu kya Bobi, bakiyimiriza.
Wabula Bobi Wine agamba nti Poliisi yonna okuva ku mukama wabwe Martin Okoth Ochola bebakulembeddemu okulemesa ekivvulu nga bebulankanya mu wooffisi.
