Omubaka Robert Kyagulayi Ssentamu amanyikiddwa nga Bobi Wine atandiise okwekubagiza nti singa yabadde omukulembeze w’eggwanga lino Uganda, abantu bonnna abenyigidde mu kumenyamenya amayumba g’abatuuze mu Lusanja mu ggombolola y’e Kasangati mu disitulikiti y’e Wakiso singa bali mu kkomera.
Bobi Wine agamba nti Omugagga Medard Kiconco eyakulembeddemu okuduumira abantu okumenyebwa n’abasirikale abakuumye abantu abaamenye, bateekeddwa okukwatibwa.
Ebyo yabyogedde bwe yabadde akyaliddeko abatuuze, abasuuka 300 abamenyeddwa amayumba gabwe nategeeza nti abakoseddwa betaaga bwenkanya wabula ssi bintu ebyasindikiddwa omukulembeze w’eggwanga Yoweri Kaguta Museveni omuli ebijanjalo akawunga n’ebirala.
Ate abamu ku batuuze nga bakulembeddwamu Hajat Mayi Nabukenya, bagamba nti mu kiseera kino betaaga obuyambi era balina okwaniriza buli mukulembeze, ayinza okubaggya mu mbeera embi gye balimu.
Okukyala kwa Robert Kyagulayi Ssentamu mu kitundu ekyamenyeddwa abamu ku batuuze basigadde mu maziga nti ayinza okubalemesa omukulembeze w’eggwanga Museveni okubayamba n’okutukiriza ebyo, byeyasubiza bwe yabadde abakyaliddeko ku lunnaku Olwokubiri.
