Poliisi y’e Kira ekutte omukyala ku by’okubba abaana babiri okuva ku kyalo Kito, Kirinya mu Disitulikiti y’e Wakiso.
Mariam Akurut omutuuze ku kyalo Adul mu ggoombolola y’e Mukura mu Disitulikiti y’e Ngora yakwatiddwa okuva mu maka ga kitaawe.
Abaana okuli Slyvia Sharon(5) ne Winnie Nakasi(7) babibwa nga 3, Novemba, 2018, we baali bava okukima amazzi, omukyala Akurut nabasuubiza okubagulira switi ne kibawaliriza okumuwerekera.
Taata w’omukyala Akurut yekengedde abaana, natemya ku Poliisi y’omu kitundu era muwala we (Akurut) yakwatiddwa oluvanyuma lw’abaana okutegeeza nti bayizi ku ssomero lya Elgon Infant School e Wakiso ate omukyala tebamumanyi wabula yabadde abasuubiza switi.
Akurut yateekeddwa kabangali ya poliisi okumuzza mu Kampala era akuumibwa ku poliisi y’e Kira ku misango gy’okubba abaana.
Omwogezi wa poliisi mu Kampala n’emiriraano, Luke Oweyesigyire agambye nti abaana bakwasiddwa abazadde ate Akurut essaawa yonna bamutwala mu kkooti.
