Elvis Mbonye eyeeyita nabbi ng’ayita mu buweereza bwe obwa ZOE Fellowship atabukidde omukulembeze w’eggwanga lino Yoweri Kaguta Museveni ku nsonga z’abalokole mu ggwanga.
Mbonye buli sabiti alina okusaba kwe mu kisaawe kya Lugogo Cricket Oval era abantu bangi nnyo n’okusingira ddala abavubuka abamukiririzaamu.
Emirundi mingi, Pulezidenti Museveni alumbaganye abalokole nti bawogana nnyo mu kusaba kwabwe okulemesa abantu okwebaka n’okutambuza emirimu gyabwe.
Museveni agamba nti Poliisi y’e Bulenga mu disitulikiti y’e Wakiso yalemwa okuwulira amasasi mu kiseera nga abatemu batta Muhammad Kirumira kuba waliwo e Kanisa ya balokole okumpi abali basaba nga bawogana nnyo.
Mungeri y’emu agamba nti Abasumba ba balokole mu bitundu by’eggwanga ebyenjawulo balemeddwa okusomesa abantu okwekolera okusobola okulwanyisa obwavu kyokka buli lunnaku babasolozaamu ensimbi.
Wabula Mbonye asinzidde mu kusaba okuwakanya ebigambo bya Pulezidenti Museveni byonna era asubiza okuwa obunnabi ku Museveni singa teyesonyiwa ensonga ezikwata mu kulyowa emyoyo gy’abantu.
