Omubaka we Kyadondo East Robert Kyagulanyi Ssentamu amanyikiddwa nga Bobi Wine ayugumizza ebitundu bye Bugiri ku mukolo ogutegekeddwa Pulezidenti w’ekibiina ekya Justice Forum (JEEMA) Asuman Basalirwa gw’okwebaza abantu abaamuwa akalulu gyebuvuddeko ng’omubaka we Bugiri.
Omukolo gwetabiddwako namungi w’omuntu omwabadde ne Hon. Kirunda Kivejinja amyuka Ssaabaminisita ow’okubiri, ababaka ba Palamenti abenjawulo, n’abakulembeze abenjawulo ku ludda oluvuganya Gavumenti.
Ku mukolo, Kivejinja yabadde omu ku bagenyi abayite kyokka Bobi Wine yayitiddwa ng’omugenyi omukulu era yayaniriziddwa mu kitiibwa okuva mu bantu bonna wakati mu bantu okuyimba ennyimba ze n’okuyimba nti Pulezidenti waffe.
Bobi Wine yasiimye abantu okulonda Basalirwa kuba y’omu ku bakulembeze abatunuliddwa okuleeta enkyukakyuka mu ggwanga lino.
Mungeri y’emu yasiimye ekitongole kya Poliisi okumukiriza okweyagalira mu ggwanga lye nga takwatiddwa.
Bobi Wine yakubiriza abantu mu bitundu bye Bugiri okufuna ‘ndaga muntu’ kuba balina okwetaba mu kulonda kwa 2021 okusobola okuleeta enkyukakyuka mu ggwanga lyabwe.
