Ssentebbe w’ekibiina kya National resistance Movement (NRM) era omukulembeze w’eggwanga lino Yoweri Kaguta Museveni akuutidde ba Resident District Commissioner (RDC) mu bitundu by’eggwanga ebyenjawyulo okuteekayo omutima okunoonyereza ensonga eziruma abantu mu bitundu gye bawangalira.

Museveni agamba nti ba RDC balina okufaayo ku nsonga ezinyigiriza abavubuka mu bitundu byabwe n’okutema empenda engeri gye bayinza okuziteeka mu nkola okusinga okuzeebalama.

Bw’abadde asisinkanyeko ba RDC bonna mu makaage e Ntebbe oluvanyuma lw’omusomo ogukulungudde annaku eziwera e Kyankwanzi, Museveni agambye nti ba RDC bonna balina okussa essira ku ntekateeka za Gavumenti zonna omuli okutumbula ebyobulamu, ebyenjigiriza, okuggya abantu mu bwavu, okunyweza ebyokwerinda n’okulondoola pulojekiti zonna ezitwaliddwa Gavumenti mu bitundu byabwe.

Ba RDC bonna basuubiza okuteeka mu nkola ebirambikiddwa Pulezidenti Museveni.