Poliisi y’e Kibuku etandiise okunoonyereza engeri omusibe gye yetugidde mu kaduukulu ka Poliisi aka Kibuku Central Police Station nga 22, April, 2019.
Okusinzira kw’adduumira Poliisi mu disitulikiti y’e Kibuku (DPC) Bashir Siriba, omusibe Moses Naulika Bonna amanyikiddwa nga Moses Mbulaiteye abadde yakwattiddwa ku misango gy’obutemu.
DPC Siriba agamba nti mu kaduukulu omusibe Mbulaiteye yabaddemu yekka era yasobodde okweyambisa omukisa ogwo, okwetta nga yeyambisa essaati ye.
Mbulaiteye ali ku musango gw’okutta eyali muganzi we Mildred Mirembe Buyondo eyali amanyikiddwa nga Milly, eyali omuyizi ku yunivaasite y’e Makerere mu mwaka gwe ogw’okubiri mu July wa 2005.
DPC Siriba agamba nti Mbulaiteye yali yekweka okutuusa lwe yakwattiddwa era batandiise okunoonyereza lwaki yesse.
