Kkooti esokerwako eya Buganda Road erangiridde nga 10, July, 2019 okutandika okuwulira omusango oguvunaanibwa omubaka wa Kyaddondo East, Robert Kyagulanyi Ssentamu amanyikiddwa nga Bobi Wine ogw’okuteekateeka okwekalakaasa mu ngeri emenya amateeka ng’awakanya omusolo gwa Mobile Money ne OTT omusolo gw’amassimu.
Mu kkooti, Bobi Wine talabiseeko era okusinzira ku munnamateeka we Asuman Basalirwa ali bweru wa ggwanga ku mirimu ebitongole kyokka akikiriddwa omubaka we Kasanda South Patrick Nsamba Oshabe omu ku bantu abamweyimirira.
Abalala abali ku musango gwe gumu David Lule amanyikiddwa nga Selector Davie, Julius Katongole, Nyanzi Fred Ssentamu ne Edward Sebuufu mu kkooti babaddemu.
Wabula oludda oluwaabi nga lukulembeddwamu omukyala Barbara Kyomugisha lusabye omulamuzi Esther Nahilya okuyisa ekiwandiiko ekikwata Bobi Wine olw’olw’okugyemera ebiragiro bya kkooti.
Omulamuzi Nahilya ayongezaayo okweyimirirwa kwa Bobi Wine okutuusa nga 10, July, 2019.
