Kyaddaki omuyimbi Bebe Cool agamba nti Bobi Wine yakoma okuvuganya mu kisaawe ky’okuyimba emyaka ena (4) egiyise.
Bebe Cool agamba nti mu kiseera kino Bobi Wine ayogerwako lwa byabufuzi mu kisaawe ky’okuyimba wabula sikugamba nti alina ennyimba enungi.
Bebe Cool bwe yabadde ku Spark TV mu Pulogulamu ‘KOONA’ ne Mile Rwamiti, yagambye nti Bobi Wine mu kiseera kino abantu bamwogerako kuba ali mu byabufuzi kuba okuyimba kwe kwasanawo emyaka 4 egiyise, “Bobi wine’s music career died four years ago, right now he is talked about because of political favour but not music”.
Bobi Wine ne Bebe Cool baludde nga balina obutakaanya mu kisaawe ky’okuyimba ate okusika omuguwa kweyongera oluvanyuma lwa Bobi Wine okwesoga ebyobufuzi mu 2017 ng’ate 2021 alindiriddwa okwesimbawo ku bwa Pulezidenti bw’eggwanga lino.
Ekirala ekibawula, Bebe Cool musajja wa NRM nnyo era muwagizi wa Pulezidenti Yoweri Kaguta Museveni ate Bobi Wine ye mukulembeze w’ekisinde kyan People Power ekyeteekateeka okuvuganya Museveni mu 2021.
