ENTIISA ebutikidde abatuuze ku kyalo Buyondo zzooni e Nsambya West, webagudde ku mulambo gw’omusajja mu kitundu kyabwe nga gusuuliddwa mu ebbali w’ekkubo.
Okusinzira ku mwogezi wa Poliisi mu Kampala n’emirirwano Patrick Onyango, omulambo tegusangiddwako kiwandiiko kyonna ate abasirikale baabwe basobodde okuzuula Helementi okumpi n’omulambo, ekiraga nti omugenzi ayinza okuba abadde avuga bodaboda.
Onyango era agambye nti omulambo gutwaliddwa mu ggwanika ly’eddwaaliro ekkulu e Mulago okwekebejjebwa era asabye abantu bonna ababuliddwaako abantu baabwe, okugenda ku ggwanika e Mulago.
Wabula abatuuze bagamba nti abasirikale basukkiridde obugayaavu okukuuma abantu n’ebintu byabwe era y’emu ku nsonga lwaki abantu bangi battibwa n’okusingira ddala aba bodaboda.
