Bamukwata mmundu abatamanyiddwa basse omukyala Sarah Namazzi myaka 21 ku kyalo Bugabo-Kibanyi mu ggombolola y’e Bamunanika mu Disitulikiti y’e Luweero ku ssaawa nga 7 ez’ekiro.
Okusinzira ku ssentebbe wa LC 2 mu muluka gwe Kibanyi, Edward Ssekandi, abatemu baayingidde mu nnyumba nga baagala okubba Pikipiki era ssemaka Joseph Ssentongo yasibiddwa akandoya nga beyambisa omuguwa.
Ssentebbe Ssekandi agamba nti omukyala Namazzi yakalambidde, okulemesa ababbi okutwala pikipiki ya bba, era yakubiddwa amasasi mu kifuba, agamutiddewo.
Pikipiki namba UER 677L yatwaliddwa era abatuuze webatuukidde okutaakiriza ng’omukyala amaze okufa ali mu kitaba kya musaayi.
Akola ng’adduumira Poliisi mu Disitulikiti y’e Luweero Rebecca Ayeta, agambye nti omulambo gutwaliddwa mu ddwaaliro ekkulu e Mulago okwekebejjebwa.
Mungeri y’emu agambye nti bakitegeddeko nti abatemu babadde basatu (3) era Poliisi etandiise okunoonyereza.
Okusinzira kw’alipoota ya Poliisi, ababbi batwala bodaboda eziri 10 bukya 2019 atandiika.
