Poliisi mu Kampala ekutte omusajja abadde yegulidde erinnya okwata aba bodaboda okubagyamu ssente nga yefudde omusirikale wa Poliisi.
Fauswali Isabirye yakwattiddwa Poliisi nga yeyambisa Kkamera z’oku nguudo era asangiddwa ng’ayambadde yunifomu ya Poliisi.
Okusinzira ku Poliisi, Isabirye ne mukwano gwe Moses Tukesiye babadde bakwata bodaboda n’ekigendererwa eky’okusaba ssente bananyini zo.
Poliisi egamba nti Isabirye abadde akwata bodaboda nasuubiza bananyini zo, okuzisanga ku Poliisi eri okumpi wabula abadde azitwala mu disitulikiti y’e Pallisa eri bakasitoma okuzitunda.
Isabirye abadde yakatwala bodaboda omuli namba UER 349U ne UEV 434V okuva ku Kampala Mukadde era Kkamera eza CCTV zamwekeneenya.
Aba bodaboda abamu abakwattiddwa, babadde bagibwako emitwalo 10 okubadiza pikipiki zaabwe.
Poliisi egamba nti mu kiseera kino Moses Tukesiye aliira ku nsiko mu disitulikiti y’e Pallisa.
