Poliisi mu ggwanga erya Nigeria ekutte omuntu owokusatu ku by’okutta abakyala mu Hotero ez’enjawulo.

Abakyala munaana (8) bebattiddwa okuva omwezi oguwedde ogwomunaana nga bonna batugiddwa mu bitundu bye Rivers state.

Olunnaku olw’eggulo ku Lwokusatu, ebibiina by’obwanakyewa ebisukka mu 70 ebirwanirira eddembe ly’abakyala byazzeemu okutuula okuteesa ku ngeri gye battibwamu.

Abakulembeze basabye ekitongole ekya Poliisi okutwala mu kkooti abantu bonna abakwattiddwa ku ky’okutta abakyala n’okunoonya bonna abakyaliira ku nsiko.

Abakyala abamu bekalakasizza era amangu ddala Kaminsona wa Poliisi Mustapha Dandaura yasobodde okutegeeza abeekalakasi nti Poliisi ekutte omuntu owokusatu ku by’okutta abakyala.

Poliisi egamba nti omuntu owokusatu yasangiddwa mu Hotero ng’aliko omukyala gw’agenda okutta era yasangiddwa akutte tawulo mu ngalo gy’agenda okumutugisa.

Kaminsona agamba nti abakwattiddwa essaawa yonna batwalibwa mu kkooti ku misango gy’okutta abantu kyokka okunoonyereza ku kyagenda mu maaso okuzuula lwaki benyigidde mu kutta abakyala ate abali mu Hotero.