Omulamuzi wa kkooti ku Buganda Road Esther Nahilya azzeemu okwongezaayo omusango oguvunaanibwa omubaka we Kyadondo East mu Palamenti Robert Kyagulanyi Ssentamu amanyikiddwa nga Bobi Wine ogw’obutagondera mateeka n’akuba olukungana ng’awakkanya omusolo gw’essimu ogwa OTT.
Bobi Wine avunaanibwa ne banne okuli; mukulu we Fred Nyanzi, Julius Katongole, David Lule ne Edward Ssebuufu (Eddy Mutwe).
Enkya ya leero, Bobi Wine ne banne bakedde mu kkooti kyokka omu ku bavunaanibwa Lule talabiseeko, ekiwaliriza omulamuzi Nahilya okwongezaayo omusango gwo okutuusa nga 12, December, 2019.
Mu kkooti, munnamateeka wa Bobi Wine ne banne Samuel Muyizi alemeddwa okuwa kkooti ensonga yonna lwaki Lule talabiseeko kuba naye yabadde amusuubira.
Bobi yaggulwako omusango guno nga kigambibwa nti yagyemeera amateeka bwe yakuba olukuhhana mu kibuga wakati ( City Square) bwe yali yeekalakaasa olw’omusolo gw’essimu (OTT) ogwatongozebwa.
Okwekalakaasa kuno kwaliwo nga 11, July, 2018 ng’oludda oluwaabi lugamba nti Bobi Wine yalemererwa okukolagana ne poliisi okulaba nga abagenda okwetaba mu lukungana tebalina mmundu.
