Omulamuzi wa kkooti enkulu etuula Entebbe Jane Frances Abodo, asalidde Godfrey Wamala amanyiddwa nga Troy okusibwa emyaka 14 lwa kutta eyali omuyimbi nnakinku Mowzey Radio.

Sabiti eno ku Mmande, omulamuzi Abodo, yasingisa Troy omusango gw’okutta Radio mu butanwa.

Omulamuzi yategeeza nti oludda oluwaabi lwalemwa okuleeta obujjulizi obulaga nti Troy yakuba Radio mu bugenderevu.

Troy yali ku misango gya butemu kyokka omulamuzi yamusingisiza gwa kutta muntu mu butanwa.
Mu kkooti, omulamuzi Abodo agambye nti Troy teyalina kigendererwa kya kutta Radio ne wankubadde yafa olw’ebisago ebyamutuusibwako mu kulwanagana mu bbaala.

Ku myaka 14, omulamuzi alagidde  Troy okusibwa emyaka 13, emyezi 3 n’ennaku 4 egisigaddeyo kuba akulungudde mu kkomera e Kigo omwaka gumu (1), emyezi 8 n’ennaku 26.

Omulamuzi Abodo awadde Troy amagezi nti waddembe okujjulita bw’aba tamatidde na kusalawo kwa kkooti.

Radio ensonga ze, ez’okuttibwa zifundikiddwa olunnaku olwaleero, era Kinnajjukirwa nti yakubwa ku bbaala ya De-Bar e Ntebe nga 22, January, 2018, naafuna ebiwundu ku mutwe era wayita sabiti emu, n’afiira ku Case Medical Centre, Kampala nga 1, February, 2018, oluvanyuma yaziikibwa e Nakawuka mu disitulikiti y’e Wakiso nga 3, February, 2018.