Poliisi ekutte abantu babiri (2) bagiyambeko mu kunoonyereza ku by’okutta omukyala Nyiramugisha Juliet myaka 43, abadde omutuuze ku kyalo Nyabune mu ggombolola y’e Murora mu disitulikiti y’e Kisoro, akawungeezi k’olunnaku olw’eggulo.
Okusinzira ku mwogezi wa Poliisi mu bitundu bye Kigezi, Elly Maate, omulambo gw’omukyala, gwasangiddwa mita 40 okuva makaage era kiteeberezebwa nti abatemu, basoose kumusobyako.
Maate agamba nti olw’amaze okumutta ng’atugiddwa, omulambo baaguyingiza mu nnyumba ku kitanda.
Akawale k’omunda ak’omugenzi, kaasangiddwa mita 30 okuva ku makaage ssaako n’engoye ezimu.
Poliisi egamba nti esobodde okukwata abantu babiri (2) okuli Nsenga Festo myaka 23, nannyini bbaala, omugenzi gye basemba okumulabako ne Turikumwe Emmanuel myaka 26, embwa ya Poliisi ekonga olusu yasibidde makaage.
Omulambo gwatwaliddwa mu ddwaaliro ekkulu e Kisoro okwekebejjebwa nga Poliisi bwenoonyereza lwaki omukyala yattiddwa.
