Omulamuzi wa kkooti ku Buganda Road Esther Nahilya azzeemu okwongezaayo omusango oguvunaanibwa omubaka we Kyadondo East mu Palamenti Robert Kyagulanyi Ssentamu amanyikiddwa nga Bobi Wine ogw’obutagondera mateeka n’akuba olukungana ng’awakkanya omusolo gw’essimu ogwa OTT.
Bobi Wine avunaanibwa ne banne okuli; mukulu we Fred Nyanzi, Julius Katongole, David Lule ne Edward Ssebuufu (Eddy Mutwe).
Enkya ya leero, oludda oluwaabi nga lukulembeddwamu Barbra Kyomugisha lutegezeza omulamuzi Nahilya nti Bobi tali mu ggwanga ali mu nsi z’ebweru ku mirimu gye emitongole, ekiwaliriza omulamuzi okwongezaayo omusango gwo okutuusa nga 24, February, 2020.
Mungeri y’emu omulamuzi ayisizza ekibaluwa ki bakuntumye ku Sebufu ne Lule nga bombi, basukkiridde okwebulankanya mu kkooti.
Bobi yaggulwako omusango ogwo nga kigambibwa nti yagyemeera amateeka bwe yakuba olukuhhana mu kibuga wakati ( City Square) bwe yali yeekalakaasa olw’omusolo gw’essimu (OTT) ogwatongozebwa.
Okwekalakaasa kuno kwaliwo nga 11, July, 2018 ng’oludda oluwaabi, lugamba nti Bobi yalemererwa okukolagana n’ekitongole ekya poliisi okulaba nga abagenda okwetaba mu lukungana balina obukuumi n’okutangira abantu abakyamu abaali bayinza okubatusaako obulabe.
