Kyaddaki omulamuzi wa kkooti ku Buganda Road Stella Amabirisi agobye omusango ogubadde guvunaanwa omutegesi w’ebivvulu Andrew Mukasa amanyiddwa nga Bajjo.
Omulamuzi Amabirisi okugoba omusango kidiridde oludda oluwaabi okubulwa obujjulizi mumusango guno.
Mu kkooti, omulamuzi bw’abadde awa ensala ye agambye nti omusango guludde nga gwongezebwayo kyokka oludda oluwaabi ne lulemererwa okuleeta wadde omuntu omu okuwa obujjulizi, ekintu ekityoboola eddembe ly’obuntu.
Mungeri y’emu omulamuzi Amabirisi agambye nti bbanga omusango lyegumaze mu kkooti singa abajulizi bagulinamu obwagazi, bandibadde bajja dda mu kkooti.
Bajjo abadde awerenemba n’omusango gw’okunyiiza Pulezidenti Yoweri Kaguta Museveni bwe yasinziira mu katambi okutegeeza nti omwaka 2021 wegulituukira nga Museveni avudde mu ntebe.
Mu kkooti, Omuloodi Ssalongo Erias Lukwabo yabadde munnamateeka we.
