Omuyimbi Rema Namakula ne bba Dr. Hamza Sebunya bawereddwa obwa Ambasadda bwa Mengo Rotary Blood Bank okuyambako mu kulwanyisa ebbula ly’omusaayi mu ggwanga.

Rema ne Hamza bagenda kuyambako okunga abantu okujjumbira okugaba omusaayi mu ggwanga lyonna.
Aba Mengo Rotary Blood Bank, balina enteekateeka ez’enjawulo omuli n’okutegeka konsati  ssaako n’ekijjulo makeke okunoonya ssente bukadde obusukka 36 okunoonya omusaayi gw’eddwaaliro e Mengo.

Mu kwogerako eri bannamawulire, Dr. Sebunya yagambye nti ensonga y’omusaayi ekwata ku buli munnayuganda era asabye bannayuganda bonna okuvaayo okugaba omusaayi.

Mungeri y’emu agambye nti balina okweyambisa ekitiibwa ekibaweereddwa okunoonya lita z’omusaayi 100,000 okusobola okutaasa bannayuganda n’okusingira ddala abakyala abafiira mu ssanya olw’ebbula ly’omusaayi.

Ate Rema agambye nti ye mukyala era ategeera bulungi nnyo obuzibu abakyala bwe bayitamu mu kuzaala. Rema asabye abantu okuvaayo okugaba omusaayi okusobola okukendeza omuwendo gw’abantu abafa.

Mu kiseera kino Rema akola ebintu eby’enjawulo ne bba Dr. Sebunya okulaga nti ali nnyo mu laavu era kigambibwa byonna abikola okulumya eyali bba omuyimbi Eddy Kenzo.