Omubaka w’e Kyadondo East, Robert Kyagulanyi Ssentamu amanyikiddwa nga Bobi Wine yekokodde ekitongole ekikuuma eddembe ekya Poliisi okumulemesa okuyimba nga beekwasa obusongasonga bwagamba nti tebuliimu.
Bobi Wine agamba nti Poliisi eyongedde okozesebwa okutyoboola eddembe ly’obuntu, okumenya amateeka, okuzannya ebyobufuzi n’okumulemesa okunoonya ssente okubezaawo famire ye.
Mungeri y’emu agambye nti abakulu mu kitongole ekya Poliisi balina okuvaayo okumutegeeza lwaki, begumbulidde okumulemesa okuyimba.
Bobi Wine era asabye ab’ebibiina ebitwala abayimbi baleme kuzinga mikono nga poliisi emulemese okukola omulimu gwe ogw’okuyimba.
Agamba nti si waakuva ku kuyimba wadde abamu ku bantu abali mu gavumenti bakozesa ebitongole by’okwerinda okumulemesa.
Kinajjukirwa nti ku lunnaku olwomukaaga, Poliisi yamulemesa okuyimba mu kivvulu ekyali kitegekeddwa mu bitundu bye Jinja ate tekimanyiddwa oba anakirizibwa okutegeka ekivvulu kye ku One Love Beach Busabala ku Boxing Day nga 26, December, 2018.
