MINISITA w’eggwanga ow’ensonga z’ebweru, Oryem Okello abikudde ekyama nti omukulembeze w’eggwanga lino Yoweri Kaguta Museveni mwetegefu okubudamya abadde omukulembeze w’eggwanga erya Sudan Omar Hassan Ahmad al-Bashir myaka 75 singa ateekayo okusaba kwe.
Minisita Oryem agamba nti Omar al-Bashir abadde munywanyi wa Pulezidenti Museveni ng’ali mu buyinza ate abadde akoze ennyo, okutebenkeza Africa omuli okulemberamu enteseganya mu ggwanga erya South Sudan wakati wa Pulezidenti Salva Kiir Mayardit n’eyali omumyuka we Dr Riek Machar.
Omar al-Bashir amaggye gamuggye mu ntebe sabiti ewedde ku lunnaku Olwokuna oluvanyuma lwa bannansi okwekalakaasa era mu kiseera kino ali mu mikono gy’amaggye.
Wabula Minisita Oryem agamba nti tewali mbeera yonna eyinza okulemesa Pulezidenti Museveni okubudamya mukwano gwe Omar al-Bashir singa asaba okuwumulira mu Uganda.
