Omuyimbi Bebe Cool alabudde abayizi ku yunivasite y’e Makerere okukomya kwekalakaasa nga balowooza nti balina okulwanyisa Gavumenti okutuuka ku birungi buli omu bye yesuunga.
Bebe yabadde ayitiddwa abayizi ab’ekisulo kya Lumumba okubasomesa ku ngeri gye bayinza okukola okutuuka ku bigendererwa byabwe kuba bonna begomba embeera enungi.
Mu kwogera kwe, Bebe Cool yagambye nti omuyizi yenna ali ku yunivasite y’e Makerere alina omukisa okufuna omulimu kyokka kwekalakaasa buli omwaka, kiremesa ebitongole bya Gavumenti ebyenjawulo okubawa emirimu olw’empisa embi zebakola ku yunivasite.
Bebe Cool era yasabye abayizi bakomye okubuzibwabuzibwa abantu ng’omubaka wa Kyadondo East, Robert Kyagulanyi Ssentamu amanyikiddwa nga Bobi Wine agamba nti eggwanga teririna gye liraga ng’ate agaggawalidde ku mulembe gwa Pulezidenti Museveni.
Bebe Cool era agamba nti kiswaza Bobi Wine okugamba nti Gavumenti ya Pulezidenti Museveni terina demokulasiya ng’ali mu Palamenti, bannansi bali mu mbeera embi, nga ye afuna omusaala gwa Palamenti buli mwezi ate musajja alina ssente zakoledde mu Gavumenti ya Museveni.
