Omubaka we Kyadondo East mu Palamenti Robert Kyagulanyi Ssentamu (Bobi Wine) asindikiddwa ku Limanda mu kkomera e Luzira okutuusa nga 2, May, 2019.
Bobi Wine asimbiddwa mu maaso g’omulamuzi wa kkooti ya Buganda Road era okusinzira ku ludda oluwaabi Bobi Wine, muganda we Fred Nyanzi Ssentamu, David Lule, Edward Sebufu n’abalala abakyalira ku nsiko, nga 11, July, 2018 wakati mu Kampala ku City Square , bakuba olukungana mu ngeri emenya amateeka n’ekigendererwa eky’okunga bannansi okugyemera okuwa omusolo ogwa Mobile Money, ekintu ekimenya amateeka nga ne Poliisi tebagitegezezaako.
Ku lunnaku olwo, kigambibwa Bobi yalemererwa okukolagana ne poliisi okukakkasa nti abantu abaali mu lukungaana lwe tebalina bissi kyokka omusango agwegaanye mu maaso g’omulamuzi Esther Nahirya.
Kkooti ekiriziddwamu abantu batono ddala omuli Famire okubadde omukyala we Barbie Itungo, bannamateeka be nga bakulembeddwamu Asuman Basalirwa era omulamuzi asindise Bobi Wine ku Limanda mu kkomera e Luzira okutuusa sabiti ejja ku Lwokuna nga 2, May, 2019.
Oluvudde mu kkooti, munnamateeka we Asuman Basalirwa, agambye nti Poliisi yeviriddeko omuntu we okusindikibwa ku Limanda, olw’okulemesa abantu be okuyingira mu kkooti, omuli n’abo abaleteddwa okumweyimirira.
Bobi agiddwa ku poliisi e Naggalama gy’abadde atwaliddwa, oluvanyuma lw’okwatibwa mu bitundu bye Kalerwe bw’abadde agenda ku kitebe kya bambega ba Poliisi e Kibuli okweyanjula, ku misango egyamugulwako, egy’okugyemera ebiragiro bya Ssabaduumizi wa poliisi mu ggwanga Martin Okoth Ochola n’okukuma mu bantu omuliro sabiti ewedde, Poliisi bwe yamulemesa okugenda mu maaso n’ekivvulu kye e Busabala.
Ku Kalerwe, Poliisi bw’ebadde eyimiriza emmotoka ye okumukwata, abatuuze bagikubye amayinja era bakubiddwamu ttiya gaasi n’amasasi mu banga okubagumbulula.
