Omubaka we Kyadondo East mu Palamenti Robert Kyagulanyi Ssentamu atabukidde mu kkooti bw’abadde ategeeza omulamuzi Esther Nahirya lwaki aguddeko emisango olunnaku olwaleero.
Okusinzira ku ludda oluwaabi Bobi Wine nga 11, July, 2018 wakati mu Kampala ku City Square, yakuba olukungana mu ngeri emenya amateeka n’ekigendererwa eky’okunga bannansi okugyemera okuwa omusolo ogwa Mobile Money, ekintu ekimenya amateeka.
Ku lunnaku olwo, kigambibwa Bobi yalemererwa okukolagana ne poliisi okukakkasa nti abantu abaali mu lukungaana lwe tebalina bissi kyokka omusango agwegaanye.
Mu kkooti agambye nti okuwakanya Gavumenti ya Pulezidenti Yoweri Kaguta Museveni y’emu ku nsonga lwaki aguddwako emisango.
Mungeri y’emu agambye nti talina muntu yenna gw’alwanyisa wabula okulwanirira bannayuganda.
