Kkooti y’amaggye e Makindye erangiridde nga 13, omwezi gunno, ogw’okutaano okuwa ensala yaayo ku misango egivunaanibwa omuyima w’akabinja ka bodaboda 2010 Hajji Abdallah Kitatta ne banne.
Kitatta ne banne omuli Matia Ssenfuka, Joel Kibirige, Hassan Ssemata, Jonathan Kayondo, Ssengooba Hassan, Sande Ssemwogerere, John Ssebandeke, Hussein Mugema, Fred Bwanika, Amon Twinomujuni ne Sowali Ngobi, bali ku misango gy’okusangibwa n’ebyokulwanyisa eby’amaggye mu ngeri emenya amateeka.
Okusinzira ku ssentebe wa kkooti, Lt. Gen. Andrew Gutti enjuyi zombi zimaze okwewozaako era nga 13, May, 2019 lwe bageenda okuwa ensala yaabwe.
Oludda oluwaabi nga lukulembeddwamu Lt. Col. Raphael Mugisha lugamba nti Kitatta ne banne basangibwa n’amasasi agasukka 50, Pisito ya Zzaabu n’emmundu endala ekika kya Sub Machine era mu kuwa obujjulizi, baleese abajjulizi 4.
Wabula munnamateeka wa Kitatta Shaban Sanywa alemeddeko nti omuntu we talina musango.
Kitatta ne banne bakwatibwa wakati wa 19 ne 21 Janwali, 2019 mu divizoni y’e Rubaga mu Disitulikiti y’e Kampala.
