Kyaddaki Paasita Teddy Naluswa Bugingo atutte bba Paasita Aloysius Bugingo owa House of Prayer Ministries International e Makerere mu mbuga z’amateeka ku Poliisi y’e Kajjansi.
Omukyala Teddy aguddewo omusango gw’okumutulugunya mu maka era agamba nti atudde ku nkato mu maka gaabwe e Kitende ku lw’e Ntebe era awadde ensonga ezenjawulo omuli Paasita Bugingo okumukaka okusatulula obufumbo ky’agamba nti ye tasobola kukikkiriza kuba Bayibuli gy’akkiririzaamu n’ekkanisa tekikirizibwa.
Teddy agamba nti okuva bba Bugingo lwe yafuna omukyala omulala Susan Makula Nantaba yakyukira ddala era mu kiseera kino batekateeka kumwanjula mu bakadde.
Bugingo azimbye enju amatiribona ku kyalo Nakedde mu Ggombolola y’e Namayumba mu disitulikiti y’e Wakiso mw’agenda okubeera n’omugole Nantaba.
Okusinzira ku mwogezi wa Poliisi mu Kampala n’emirirwano Patrick Onyango, baafunye okwemulugunya kw’omukyala Teddy era Poliisi etandiise okunoonyereza.
