Kyaddaki kkooti y’amaggye etuula e Makindye enkya ya leero, esindise mu kkomera e Luzira Hajji Abdullah Kitatta okusibwa emyaka 8, emyezi 8 n’ennaku 6.
Kkooti y’emu ebadde ekubirizibwa Lt Gen Andrew Gutti ekalize eyali omukuumi wa Kitatta, Ngobi Sowali naye emyaka 8, emyezi 8 n’ennaku 6.
Kitatta ne Sowali, olunnaku olw’eggulo basingisiddwa emisango ebiri egy’okusangibwa n’emmundu n’amasasi agasukka 30 mu ngeri emenya amateeka.
Mu kuwa ensala ye, Ssentebbe Lt Gen Gutti agambye nti Kitatta ne Sowali, babadde bateekeddwa okusibwa emyaka 10 ku buli musango kyokka basaliddwako ebbanga lye bakulungudde ku limanda, omwaka ogumu (1) emyezi 3 n’ennaku 24.
Ssentebbe era agambye nti okusibwa emyaka 10, kikoleddwa okutangira bannansi okuddamu okusangibwa n’ebyokulwanyisa mu ngeri emenya amateeka.
