Poliisi etandiise okunoonyereza ku ngeri abalongo ba minisita omubeezi ow’ebyamazzi Ronald Kibuule ab’emyaka ebiri gye bafiiridde mu kidiba ekiwugirwamu, akawungeezi k’olunnaku olw’eggulo mu maka ga minisita Kibuule agasangibwa ku kyalo Mbalala mu disitulikiti y’e Mukono.
Kigambibwa nti abalongo okuli Wasswa ne Kato baasoose kuzannyira kumpi n’ekidiba ekiwugirwamu era mbu Omulongo omu ye yasoose okugwamu n’omulala n’agoberera bwe yabadde alingiza okulaba munne gy’alaze.
Mu kiseera kino Ssalongo Kibuule yabadde tali waka ate Nnaalongo Fortunate Andinda Kibuule kigambibwa yabadde mu nju.
Okusinzira kw’adduumira Poliisi mu bitundu bye Mukono, Rogers Sseguya, Poliisi etandiise okunoonyereza basobole okuzuulira ddala ekyavuddeko okufa kw’abalongo.
Sseguya agamba nti olunnaku olw’eggulo, emirambo gyatwaliddwa mu ddwaaliro e Mulago okwekebejjebwa okuzuula ebisingawo.
