Mukyala wa Polof. Bukenya ow’empeta amututte mu kkooti baawukane, luluno olukalala lw’abakyala abayimbi abakulusanyiza waaya ya bba

Mukyala wa Polof Gilbert Bukenya ow’empeta, Dr. Margaret Bukenya addukidde mu kkooti enkulu mu Kampala, okusaba kkooti esatulule obufumbo bwabwe.

Dr. Margaret omutuuze w’e Ntinda mu Minister’s Village omusango guno yagututte mu kkooti enkulu etawulula enkaayana z’abafumbo ku fayiro nnamba DC 069/2019 ng’ayise mu bannamateeka be aba Ligomarc Advocates n’aloopa Polof. Bukenya omutuuze we Garuga, Wakiso nti asukkiridde obwenzi era ng’amulumiriza obutayisa sikaati yonna mu bulamu bwe.

Mu kiwandiiko, Dr. Margaret agamba nti baagattibwa mu bufumbo  obutukuvu nga September 21, 1974 ku St. Augustine Chapel ku yunivasite e Makerere.

Okusinzira ku lupapula lwa Bukedde, Dr. Margaret anokoddeyo abakyala abenjawulo abatabangudde obufumbo bwe mu myaka 45 nga bamwagalira omusajja omuli abayimbi, bannakatemba ne bannabyabufuzi.

Mu kkooti awaddeyo abakyala omuli omuyimbi Irene Namubiru, Jackie Tusiime amanyikiddwa nga Jackie O, Sheila Nvannungi, Omubaka omukyala ow’e Lwengo Cissy Namujju n’abalala.

Dr. Margaret era agamba nti bba Bukenya abadde ayagala bakaabasajja bangi nnyo era asaba kkooti ekirize okusaba kwe baawukane.

SK OMUZINNYI