Poliisi y’e Nakasero ekutte abantu babiri (2) ku by’okukuba omukozi w’ekitongole ekya KCCA Mathias Ssekamatte sabiti ewedde ku Lwokuna ku ssaawa 12:30 ez’okumakya ne babba n’ebintu bye.
Abakwattiddwa kuliko Japhali Kidaida ne Ashraf Matovu amanyikiddwa nga Steven ku by’okubba n’okukuba Ssekamatte.
Okusinzira kw’amyuka omwogezi wa Poliisi mu Kampala n’emirirwano Luke Oweyesigyire, Ssekamatte ali mu ddwaaliro e Nsambya kuba yakubwa nnyo.
Oweyesigyire agamba nti Poliisi yasobodde okweyambisa Kamera eza CCTV mu Kampala okukwata Japhali ne Matovu era mu kiseera kino bakuumibwa ku kitebe kya Poliisi mu Kampala (CPS) ku misango gy’okubba n’okulumya omuntu.
