Bya Nalule Aminah
Entiisa ebutikidde abatuuze ku kyalo Kalubanda mu ggombolola y’e Kyazanga mu Disitulikiti y’e Lwengo, mutuuze munaabwe bw’attiddwa mu bukambwe era omulambo gwe gusangiddwa nga gusuuliddwa ebbali w’ekkubo.
Iganiro Vincent myaka 41 abadde avuga bodaboda era omulambo gwe, gubadde gusibiddwa emiguwa mu bulago.
Okusinzira ku mwogezi wa Poliisi mu bendobendo ly’e Masaka Kangave Paul, Iganiro yattiddwa abantu abatamanyiddwa, pikipiki ye yatwaliddwa wabula Poliisi etandiise okunoonyereza.
Kangave asabye abatuuze abalina amawulire ku by’okutta Iganiro okuyamba Poliisi okusobola okukwata abatemu.
Omugenzi Iganiro abadde avugira bodaboda mu katawuni k’e Lwengo ku luguudo lwe Mbarara – Masaka.
