Abasuubuzi musanvu (7) bafiiridde mu kabenje ate basatu (3) basigadde mu maziga nga balina ebiwuundu eby’amanyi emmotoka yaabwe ekika kya FUSO namba UAZ 314Z bwe yefudde emirundi egiwera ku kyalo Akworo mu ggombolola y’e Labongo Amida, kilomita 7 okuva mu Monisipaali y’e Kitgum ku ssaawa 11 ez’okumakya.
Okusinzira ku mubaka wa Pulezidenti mu Disitulikiti y’e Kitgum, (RDC) William Komakech, abasuubuzi babadde bava mu katale k’e Paidha mu disitulikiti y’e Zombo okudda e Kitgum, emmotoka yabwe neyefuula bweremeredde omugoba waayo era 7 bafiiriddewo.
Abafudde kuliko Gladys Aber, Julius Ocira Ataa, Jacqueline Auma, Martin Ojok, Francis Okeny, James Obua n’omulala ategerekeseeko erya Ojara.
Ate abafunye ebisago okuli Charles Abwola, Brian Omony ne David Okello bali ku ndiri mu ddwaaliro ekkulu e Kitgum.
RDC Komakech agambye nti emirambo gitwaliddwa mu ddwaaliro e Kitgum nga Poliisi bwenoonyereza okuzuula ekituufu ekivuddeko akabenje.
