Omulamuzi wa kkooti enkulu mu Kampala Yasin Nyanzi agaanye okuwa ensala ye, kukusaba okwatwalibwayo Godfrey Wamala amanyikiddwa nga Troy okusaba okweyimirirwa.
Troy ali ku misango gy’okutta eyali omuyimbi nakinku Mowzey Radio eyafa mu 2018 oluvanyuma lw’okukubwa mu bbaala ya De Bar Entebbe.
Mu kkooti, omulamuzi Nyanzi agambye nti okusaba kwa Troy kuddeyo mu maaso g’omulamuzi Jane Francis Abodo, eyawuliriza okusaba kwe okwasooka.
Omulamuzi Abodo yagoba okusaba kwa Troy okweyimirirwa olw’okulemwa okutuukiriza ebyetagisa.
Bannamateeka ba Troy kwekukyusa omulamuzi ne baduukira eri omulamuzi Nyanzi kyokka naye abazizayo ku mulamuzi Abodo eyasooka okuwuliriza okusaba kwe.
Omulamuzi Nyanzi agambye nti Troy okutukiriza ebyetagisa, talina kukyusa mulamuzi wabula okuddayo ku mulamuzi gwe yasokerako, okuddamu okusaba okweyimirirwa.
Troy abadde alina essuubi ly’okuyimbulwa wabula ebigambo by’omulamuzi Nyanzi bimuleese ebiyengeyenge mu maaso kuba ayolekedde okuvundira mu kkomera e Luzira.
