Poliisi eraze eggwanga nti erina obujjulizi obutuufu ku by’okufa kwa Michael Arinda amanyikiddwa nga Ziggy Wine myaka 28 eyafudde ekkiro ky’olunnaku olwa Ssande nga 4, August, 2019.
Sabiti eno ku Lwokubiri, Poliisi yategeeza nti Ziggy Wine okufa, yafuna akabenje keyafuna mu bitundu bye Kyebando nga 21, July, 2019.
Enanga yagamba nti Ziggy Wine yali ku pikipiki ekika kya Honda ng’ava e Kyebando okudda e Kalerwe kwekutomera omukyala omusomesa Roy Atworo era abazirakisa be baamutwala mu kalwaliro akali okumpi ng’ali mu mbeera mbi.
Oluvanyuma bamutwala mu ddwaaliro e Nsambya, gye bamuggya okumutwala mu ddwaaliro e Mulago.
Agamba nti okufa kwe temuli byabufuzi wabula kaali kabenje era kiteberezebwa nti eriiso okuvaamu, yafuna obuzibu ku mutwe.
Wabula abawagizi b’ekisinde kya People Power bagamba nti Poliisi yaleeta omusirikale waabwe ASP Helen Butoto omwogezi wa Poliisi mu bitundu bye Ssezibwa okuwudiisa eggwanga nti ye Roy Atworo eyatomerwa Ziggy Wine e Kyebando.
Ku nsonga eyo, Poliisi esobodde okuleeta abakyala babiri (2) okuli ASP Butoto n’omusomesa Atworo okulaga ensi nti waliwo enjawulo wakati w’abakyala bombi.
Okusinzira kw’amyuka omwogezi wa Poliisi mu ggwanga Polly Namaye, bannayuganda balina okukomya obulimba kuba kikyamu okugamba nti Poliisi yaleese ASP Butoto okwefuula Atworo.
Poliisi okuleeta ASP Butoto ne Atworo kabonero akalaga nti bajjewo obulimba bw’ekisinde kya People Power nti omukyala yabadde omu ne yefuula Atworo.
