Poliisi y’e Kabale etandiise okunoonyereza engeri omuwala myaka 23 gye yakubiddwa amasannyalaze era yasangiddwa mu nnyumba nga yafudde dda.
Justin Ninsima abadde mutuuze ku kyalo Karambi cell mu ggombolola y’e Muko mu disitulikiti y’e Rubanda, yabadde agenze kukyalira ku muganzi we Pius Muhereza omutuuze mu Monisipaali y’e Kabale.
Okusinzira ku batuuze, omuwala weyatuukidde nga muganzi we Muhereza agenda ku mirimu gye mu Kampala, kwe kumuleka awaka.
Omulenzi agamba nti obwedda akuba ku ssimu ya muganzi we nga takwata era agenze okudda ng’enju nzigule, oluyingidde, amaaso gatuukidde ku mulambo gwa Ninsima.
Omulambo gusangiddwa wansi okumpi n’ekitanda era yafudde akutte ebinika y’amazzi efumba ccaayi, nga yonna esiridde.
Mungeri y’emu enviiri zibadde ziyidde n’ekitundu ku ffeesi nga kisiridde ssaako n’engalo ezabadde zikutte ebinika.
Omwogezi wa Poliisi mu bitundu bye Kigezi Elly Maate agambye nti omulambo gwa Ninsima guweereddwa abooluganda okuziikibwa nga Poliisi bwenoonyereza ekyavudde amasannyalaze okumutta.
