Oludda oluwaabi nga lukulembeddwamu Barbra Kyomugisha lusabye omulamuzi wa kkooti ku luguudo Buganda Joan Ketty Acaa okubongera obudde okusobola okuleeta abajjulizi mu musango oguvunaanibwa omubaka we Kyadondo East Robert Kyagulanyi Ssentamu amanyikiddwa nga Bobi Wine ne banne 4.
Robert Kyagulanyi ne banne okuli David Lule, Julius Katongole, Fred Nyanzi Ssentamu ne Edward Sebufu amanyikiddwa nga Eddy Mutwe bali ku musango gw’okukuba olukungana mu ngeri emenya amateeka ku City Square mu Kampala mu gwomusanvu gwa 2018 webaali bawakanya okuteeka omusolo gwa shs 200 ku buli lunnaku ogwa OTT.
Enkya ya leero, oludda oluwaabi lugambye nti babadde tebanaba kutegeeza bajjulizi kujja mu kkooti kuba Kyagulanyi ne banne babadde basukkiridde okwebulankanya.
Acaa asuubiza, okuleeta abajjulizi bonna mu kkooti nga 17, September, 2019, Kyagulanyi ne banne lwe balagiddwa okudda mu kkooti.
Bannamateeka ba Kyagulanyi ne banne nga bakulembeddwamu Benjamin Katana, Shamim Malende ne Luyimbazi Nalukola basabye oludda oluwaabi okutuukiriza kye basuubiza okuleeta abajjulizi ku lunnaku lwe bakiriziganyizza nga 17, September, 2019.
