Poliisi e Mbale atandiise okunoonyereza engeri omusajja Charles Wamuna myaka 19 gye yattiddwamu akawungeezi k’olunnaku olw’eggulo oluvanyuma lw’okulemwa okusasula ebbanja lya shs 1,000.
Wamuna abadde mutuuze ku kyalo Buteza mu Disitulikiti y’e Siroko era okusinzira ku batuuze nga bakulembeddwamu Julius Nadenge, omugenzi yabadde ne mikwano gye basatu (3) nga bali mu kuzannya matatu kyokka oluvanyuma nga bamuwangudde yalemeddwa okuwaayo ssente.
Omuzannyo gwabadde gwa shs 1,500 ng’alinako shs 500, kwekutandiika okumukuba wakati mu kulajana.
Abatuuze bagamba nti Wamuna, yafudde nga bakamutuusa mu ddwaaliro e Mbale.
Omwogezi wa Poliisi mu bitundu bya Elgon, Robert Tukei agambye nti Poliisi ekutte omuntu omu (1) nga bwenoonya abantu bonna abenyigidde mu kutta Wamuna.
Poliisi egamba nti abanoonyezebwa baguddwako ogw’obutemu era basabye abatuuze okolagana obulungi okubanoonya bakwatibwe.
