Poliisi y’e Ntebbe ekutte omusawo w’ekinnansi Julius Kule atemera mu gy’obukulu 63, omutuuze ku kyalo Kitubulu mu tawuni kanso y’e Katabi mu disitulikiti y’e Wakiso, ku by’okudda ku mwana omuto namusobyako.
Okusinzira ku Poliisi, akawungeezi k’olunnaku olw’eggulo, taata w’omwana Ismail Baraka yaduukidde ku Poliisi y’e Ntebbe, okubategeeza ng’omusawo w’ekinnansi Kule bw’abadde asobya ku mwana myaka 12.
Mu sitetimenti omwana gy’awadde ku Poliisi y’e Ntebbe, agambye nti omusawo w’ekinnansi Kule yamusobyako emirundi egy’enjawulo wakati w’omwezi Ogwokubiri n’ogwo Musanvu, Kitaawe bwe yali amututteyo okumujjanjaba eddogo.
Ku Poliisi, taata w’omwana agambye nti muwala we ng’ali mu mbeera embi, bamuwa amagezi okumutwala ku musawo w’ekinnansi, era webatuuka mu Ssabo lya Kule kwekumutegeeza omwana okumuleka yekka, asobole okumukolako obulungi obudde obw’ekiro.
Taata Baraka agamba nti obudde obw’ekkiro, omusawo w’ekinnansi Kule, yatwala omwana mu nsiko namusobyako wakati mu kumutegeeza nti amuteekamu ddagala okuwona.
Omwana wakati mu kulukusa maziga agambye nti bamutwalanga mu kibira kye Gombolola mu tawuni kanso y’e Katabi okumusobyako wakati mu kulumwa.
Akulira okunoonyereza ku buzzi bw’emisango ku Poliisi y’e Ntebbe, Onesmus Mwesigwa agambye nti omusawo w’ekinnansi Kule aguddwako omusango gw’okujjula ebitanajja era essaawa yonna bamutwala mu kkooti.
