Bya Nalule Aminah
Kyaddaki ekitongole ekivunaanyizibwa ku bigezo mu ggwanga ekya Uganda National Examinations Board (UNEB) kifulumizza entekateeka yonna engeri abayizi gye bageenda okutuula ebigezo mu ttaamu ey’okusatu.
Okusinzira ku Ssaabawandiisi wa UNEB Dan Odongo, abayizi abali mu kibiina eky’omusanvu (P7) nga 2, November, abasomesa balina okubateekateeka ekimanyiddwa nga “briefing” ate nga 4 ne 5, November batuule ebigezo.
Ate abayizi abali mu S4, balina ‘briefing’ nga 11, October, ate okuva nga 14, October, 2019 okutuusa nga 15, November, 2019, batuule ebigezo.
Ate abayizi ba S6, balina ‘briefing’ nga 8, November, ate okuva 11, Novembe, 2019 okutuusa nga 2, December, 2019.
Mu kwogerako eri bannamawulire ku Media Center mu Kampala, Odongo asabye abazadde okweyambisa ennaku ezisigaddeyo okugenda ku massomero okulaba nti oba kituufu abaana baabwe bawandiisibwa.
