Minisita omubeezi ow’ebyenjigiriza ebisookerwako Rosemary Nansubuga Sseninde awagidde okusaba kwa ssaabawandiisi w’ekitongole kye bigezo mu ggwanga ekya Uganda National Examinations Board (UNEB), Dan Odongo amassomero gonna mu ggwanga okuwa omukisa abayizi abali embuto, okutuula ebigezo byabwe.
Odongo agamba nti bangi ku baana abali embuto baazifuna olw’obutamanya, okulimbibwa olw’okusomozebwa kwe bayitamu era okufuna olubuto kiraga nti aboneredde ng’amassomero galina okubasembeza okubakiriza okutuula ebigezo.
Ate Minisita Sseninde agambye nti Minisitule tewagira ky’abaana kufuna mbuto kyokka singa omuyizi yenna afuna olubuto, essomero limuwe omukisa okutuula ebigezo okusobola okutaasa ebiseera bye eby’omu maaso.
Okusinzira ku ntekateeka ya UNEB abayizi abali mu kibiina eky’omusanvu (P7) nga 2, November, abasomesa balina okubateekateeka ekimanyiddwa nga “briefing” ate nga 4 ne 5, November batuule ebigezo.
Ate abayizi abali mu S4, balina ‘briefing’ nga 11, October, ate okuva nga 14, October, 2019 okutuusa nga 15, November, 2019, batuule ebigezo.
Ate abayizi ba S6, balina ‘briefing’ nga 8, November, ate okuva 11, Novembe, 2019 okutuusa nga 2, December, 2019.
