Poliisi ekutte omuntu omu ku by’okutta omukadde ategerekeseeko erya Federesi myaka 82 abadde omutuuze ku kyalo Butumi mu ggombolola y’e Kiyuni mu disitulikiti Mubende.
Akwattiddwa muzzukulu, ategerekeseeko erya Sewante era atwaliddwa ku kitebe kya Poliisi e Mubende.
Okusinzira ku mwogezi wa Poliisi mu bitundu bye Wamala, Nobert Ochom, Federesi abadde alina obutakaanya ne Ssewante ku nsonga z’ettaka nga waliwo ekitundu ekikayanirwa.
Kigambibwa, Sewante yakitegeddeko nti Federesi yatunze kasooli emitwalo 20, kwekumulumba okubba ssente zonna obudde obw’ekiro wabula wakati mu kusika omuguwa, yamutemye ejjambiya ebitundu by’omubiri eby’enjawulo era yafiiriddewo.
Omulambo gutwaliddwa mu ddwaaliro e Mubende okwekebejjebwa abasawo ate Sewante aguddwako emisango ebbiri egy’obubbi n’obutemu.
