Gavumenti ya America ekulemberwa Donald John Trump nga eyita mu Treasury Department evuddeyo neteeka envumbo ku eyali omuduumizi wa Poliisi ya Uganda Gen. Edward Kale Kayihura ng’emuvunaana obukenuzi n’okulinyirira eddembe ly’obuntu mu kiseera ng’ali mu offisi wakati wa 2005-2018.
Mu kiwandiiko ekifulumiziddwa olwaleero, Gavumenti ya Amerika egamba nti Gen Kayihura yenyigira butereevu mu kutulugunya abasibe e Nalufenya mu Jinja n’ebitundu ebirala.
Kigambibwa nti Kayihura nga omuduumizi wa Poliisi yalina abantu mu kitongole kye omuli aba Flying Squad abenyigiranga mu kutulugunya abasibe e Nalufenya Special Investigations Center (NSIC).
Mu kiwandiiko, eby’obugagga bya Gen Kayihura mu ggwanga erya America byonna biteekeddwako envumbo.
Abalala abakoseddwa kuliko mukyala we Angela Umurisa Gabuka muwala we Tesi Uwibambe ne mutabani we Kale Rudahigwa.
