Poliisi y’e Agago etandiise okunoonyereza engeri omukyala gy’afiiridde mu ssabo ly’omusawo w’ekinnansi ku kyalo Ogwang Kamolo East mu ggombolola y’e Lapono.
Suzan Akot myaka 30 yafudde akawungeezi k’olunnaku olw’eggulo ku Lwokutaano oluvanyuma lw’okuzaala omwana omulenzi.
Okusinzira kw’akulira Poliisi y’oku kyalo Lapono, James Lero, Akot yagenze mu ssabo okuzaala oluvanyuma lw’okulemererwa okufuna ssente z’entambula okugenda mu ddwaaliro erya Dr Ambrosoli Memorial Hospital ku kyalo Kalongo okuzaala.
Lero era agamba nti bba Omony Aweri yagaanye okuwa mukyala we Akot ssente z’entambula era y’emu ku nsonga lwaki yafundikidde agenze mu ssabo okuzaala, mita 800 okuva awaka.
Omusajja Aweri akwattiddwa ku misango gy’okulagajjalira mukyala we era Poliisi etandiise okunoonyereza.
Mungeri y’emu n’omusawo w’ekinnansi anoonyezebwa okuyambako Poliisi mu kunoonyereza ekyaviriddeko Akot okufa.
Mathew Lagen, ssentebbe wa LCIII mu ggombolola y’e Lapono agambye nti omwana wakutwalibwa mu kifo ekirabirira abaana mu ggombolola y’e Kitgum kuba ali mu mbeera nungi mu kiseera kino.
