Minisita omubeezi ow’ebyatekinologiya Aidah Erios Nantaba agamba nti ennaku ezimu yejjusa okuyingira ebyobufuzi okuwereza eggwanga lye.
Nantaba mu kiseera kino ye mubaka omukyala ow’e Kayunga era ali mu kkooti ku misango gy’okuvaako Ronald Ssebulime okufa.
Ssebulime yattibwa mu bitundu by’e Nagojje bwe yali agezaako okugoberera emmotoka ya Nantaba bwe yali ava e Kayunga ng’adda e Kampala.
Ssebulime yakwatibwa n’assibwa ku kabangali ya poliisi oluvannyuma n’aggyibwako n’akubwa amasasi emirundi ebiri n’attibwa nga March 24, 2019.
Wabula Minisita Nantaba agamba nti bukya ayingira eby’obufuzi, asimatuse okuttibwa emirundi mingi nnyo era y’emu ku nsonga lwaki ennaku ezimu yejjusa okuyingira eby’obufuzi.
Mu kwogera kwa Nantaba, anokoddeyo engeri Ssebulime gye yattibwa kyokka n’okutuusa olunnaku olwaleero, Poliisi ekyalemeddwa okutegeeza eggwanga omukulu eyawa omusirikale David Ssali ebiragiro okutta Ssebulime.
Agamba nti embeera eri mu ggwanga, eby’obufuzi bigwana balyake, balimba ate nga babbi.
