Bya Nakaayi Rashidah
Abayizi abawala ku yunivasite y’e Makerere bagamba nti bangi ku banaabwe begumbulidde okwetunda okusobola okufuna ebisale ebya ‘tuition’.
Enkya ya leero, abawala bakedde kwekalakasa nga bawakanya ekya yunivasite okwongeza ‘tuition’ ebitundu 15 ku 100 omwaka oguwedde nga zongezebwa mpolampola mu myaka 5.
Mu kwekalakasa, Poliisi nga yegatiddwako amaggye balemeseza abayizi okutwala okwemulugunya kwabwe mu offiisi y’omukulembeze w’eggwanga Yoweri Kaguta Museveni mu Kampala, era babazinzeeko nga bakafuluma ggeeti ya yunivasite.
Abayizi bagamba nti okwongeza ssente kitunuulidde abayizi abesasulira fees, abali ku sikaala ya Gavumenti tebayongezeddwa era y’emu ku nsonga lwaki bangi ku banaabwe balemeddwa okufundikira emisomo n’okwenyigira mu kwetunda okusobola okunoonya ssente.
Poliisi ekutteko abayizi 12 era batwaliddwa ku Poliisi y’e Wandegeya.
