Poliisi mu disitulikiti y’e Omoro ekutte omusajja myaka 35 lwa kutta mukyala we Christine Ajok olw’okumutebereza nti abadde alina abasajja abalala.
Ajok attiddwa ekkiro ekikeseza olunaku lwa leero ku kyalo Te- olam mu ggombolola y’e Odek.
Kigambibwa omusajja Geoffrey Olanya yabadde mu kuyombagana ne Ajok, ekyavuddemu okulwanagana era omusajja yakutte enkumbi naagikuba omukyala ku mutwe era yagudde wansi avaamu omusaayi mungi era naafiirawo.
Omwogezi wa Poliisi mu bitundu bye Aswa Jimmy Patrick Okema agambye nti Olanya akwattiddwa ku misango gy’obutemu ate omulambo gw’omukyala gutwaliddwa mu ddwaaliro lye Gulu okwekebejjebwa.
Mungeri y’emu Okema alabudde abatuuze okwesigangana n’okwagalana mu bufumbo ssaako n’okweyambisa Poliisi singa bafunamu obutakaanya.
