Bya Nalule Aminah
Maama w’omugenzi Jane Kasubo tamatidde n’ekibonerezo ekiwereddwa Godfrey Wamala amanyiddwa nga Troy abadde ku misango gy’okutta mutabani we eyali omuyimbi nnakinku Mowzey Radio.
Enkya ya leero, Omulamuzi wa kkooti enkulu etuula Entebbe Jane Frances Abodo, asalidde Troy okusibwa emyaka 14 lwa kutta Radio mu butanwa.
Mu kkooti, omulamuzi Abodo agambye nti Troy teyalina kigendererwa kya kutta Radio ne wankubadde yafa olw’ebisago ebyamutuusibwako mu kulwanagana mu bbaala ya De-Bar e Ntebe.
Ku myaka 14, omulamuzi alagidde Troy okusibwa emyaka 13, emyezi 3 n’ennaku 4 egisigaddeyo kuba akulungudde mu kkomera e Kigo omwaka gumu (1), emyezi 8 n’ennaku 26.
Oluvudde mu kkooti, maama Kasubo Jane ayogeddeko eri bannamawulire era agambye nti tamatidde bivudde mu kkooti kyokka ensonga zonna azikwasiza Omutonzi, “njagala Mukama Katonda amusasulira kuba nze mbadde njagala bamusibe obulamu bwe bwonna“.
Ate aba famire y’omugenzi abalala, bagamba nti Poliisi okulagajjalira omulimu ne balemwa okutuuka mu kifo mu budde mu kiseera nga Radio akubiddwa, y’emu ku nsonga lwaki Troy yagiddwako omusango gw’obutemu ne bamusingisa ogw’okutta Radio mu butanwa.
